Todo chega ao seu fin

Teño moi pouco tempo para subir este comentario, xa que o tempo se me bota enriba.
Quixera poder escribir máis sobre esta materia que agora rematamos, pero os prazos de entrega son estritos, máis do que pensei hai uns días.
Que podo dicir da materia de Infografía e Ilustración? Que nun cuadrimestre non se pode facer moito, especialmente se andamos á porfía entre a técnica e a tecnoloxía.
Eu, e coma min moitos, non tiña nin idea de utilizar ningún dos programas que empregamos nas aulas (Flash, Photoshop, Illustrator). E teño que dicir que os coñecementos que agora teño destes programas, non de todos, son grazas aos tutoriais de Youtube. O que fixemos nas aulas foime útil, claro que si. Non podo esquecer a mestría de Fran, que coido que sabía máis do tema do recomendado. E tampouco da profesora (que non lle gusta que o seu nome apareza), que vaia, púxolle empeño.
Pero vamos a ser realistas. Isto era para algo máis dun cuadrimestre.
O capador mentres capa non asubía. E entre capas e interpolacións de movemento rematei por aborrecer uns programas que non acababa de entender e dos que non tiña tempo abondo para practicar na casa.
Só a necesidade de ter que entregar as prácticas finais fixo que me puxera en serio e, o resultado, vaia por deus.

A visualización da información non é un tema baladí. Coido que nunca me enfrontei a retos tan inalcanzables para min. Cando un redacta, mal que ben, un pode ir escribindo e darlle unha voltas ata que lle quede algo medianamente coherente e ata resultón.
Pero, no caso dunha infografía, cómpre ter os conceptos claros desde o principio. Senón, é como empezar unha casa polo tellado. Os alicerces de calquera infografía son os datos. Esa é a clave. De nada serve que saibas facer marabillas cos programas de deseño se despois non fas máis que enfeitar esterco con purpurina.
Aí está o erro. Catro meses (lectivos) para aprender non só a empregar os programas, senón tamén saber visualizar a información, ser analítico para ser sintético. Resumir os datos na súa expresión icónica máis sinxela.
Evidentemente, nin estaba acostumado a traballar a dous tempos e, teño que recoñecelo, definitivamente creo que a infografía non é o meu.

De todos os xeitos agora penso que puiden facer máis. Ver que era o que se cocía neses mundos do deseño, da ilustración e da infografía.
Coido que tamén a profesora agardaba algo máis de todos nós. Supoño que pensaría que iamos ser máis activos e creativos.
Ao respecto teño que dicir que pola miña parte non foi así.

Da materia digo o do principio, moita cousa entre programas e teoría (sempre e cando queiras enterarte un pouco do que estás a estudar).
Estes programas non se aprenden en dous días.
E teño que dicir que o curso de Flash non chegou no mellor momento.
Aparte de que non puiden asistir por motivos de incompatibilidade coas prácticas, as datas eran moi próximas ás do período de exames.
Senón, seguro que podería ir maís xente, e non só os da facultade, porque falei con xente de fóra da facultade que estaba interesada, pero nunhas datas tan achegadas aos exames non poderían asistir.

En fin, xa son horas de ir rematando.
Ogallá facer un infográfico fose tan doado como escribir este texto (pobre e feito ás presas).

Remato xa.
Pola miña banda, a participación neste Infilus rematou.
Ata máis ver.